Search
  • Jamil Doaihi

الشاعر د. جميل الدويهي: اسمي انكتب عالصفصاف


اسمي انكتب هونيك... عالصفْصاف

وفي ناس قالو: تغيّر المطرَح...

وقْعو الأسامي بالهوا، وبْخاف

لولا وقعتْ عالارض... إتجَرّح...

وصّيت شجرة لَوز حدّ البيت:

هاك الصبي لا تتركو وتمْشي...

تاري الشجَر بيرُوح عالسكّيت...

واللي بقِي لي من الوَرق... كمشه...

وبنتْ الوحيده من زمان بْعيد

صارت ورا الحيطان منسيّه

ما لقْيتْ الفستان يَوم العيد

مِن بعد ما هِرْبو الحراميّه...

واللي تركني وغاب مدري لوين؟

عنوان بيتي وين؟ ما تذكّر...

راحت سفينة نوح من سنتين

لا بترْجَع... ولا البَحر عم يزْغر...

كان القمر ما يطْلَع من الحيّْ

وتْياب فضّه غاليه عْطيتو...

فجأة اختفى منّي، وغِرق بالميّ...

فضّيت كلّ النهر. ما لْقيتو.

لا تزيّنو الساحَه، بعد بكّير...

الساحر أخدْني... وضاع من إيدي

وفي ناس متلي من زمان كتير...

حبّو السهر عا شطوط البعيده...

صورة إلي، عم شُوفها من هَون...

بين الشمس والفَيّ مكسوره

غيري سرقها، وشال منها اللون

وقاعِد محلّي فوق بالصُّوره.

#كتاب

0 views