Search
  • Jamil Doaihi

كلود ناصيف حرب: بعرف ابتسامتك


الصباح ما بيطلع الا من قلب الليل...

وأجمل الصباحات إلك.

بعرف ابتسامتك

بتلوّن طريقي بالورد والياسمين...

إنت قمر الجمال

وهيك رح ضل إكتبلك قصائد الحنين والخيال .

هالنور بآخر الغابه

ابتسامتي...

وهيّي إلك وحدك...

ابتسامتي بتفضحني

كلما حدا قال إسمك.

صابيعك من دهب

او نغمة قصب؟

ارسملي بالهوا قلب متل قلبك رقيق وغالي.

تا اسرقو وخبيه...

قلبك الي وحدي...

هيك كل يوم بقول

وهيك بحبك عاطول

واكتر من هيك... بحبّك.

إنت معي ومش معي

وين بخبّيك؟

بدفتر حنيني؟

بخزانة أفراحي وذكرياتي معك؟

ليش قصتنا أنا واياك كانت صعبه؟

بدايتها عبير وحقول مليانه فرح

ونهايتها سؤال ما بلاقيلو جواب؟

هالصمت بيحكيلي عنك

قديش إنت مشتاق تكون حدي،

تحكيلي عنك

وعن أفكارك...

وتتطلع بعيوني تا تلاقي دقيقة أمان،

بعمر مليان أحزان.

ولووو قديش حبّيتك

لأنك متل البحر الكبير،

لأنك متل الشتي اللي نازل عالسهل.

لأنك كل لحظة من حياتي فيها نور وقمح البيادر...

بحْزن عليك كيف هيك ناطر

عالطريق...

عالمقاعد...

تحت الشجر...

ولأنك بتحبني هلقد سميتك قمر...

وسميتك وحدك وحدك كل البشر...

صباحك نغمات على قيثارة الحنين.

شو بتسوى هالدني غير بسمة امل

وضحكه متل قلب السما؟...

بسلّم عليك من ضجر الأيام

وعتم الليل

وبقلك: صورتك الحلوه متل النجمه

مضويّه بقلبي ..

ضلّك يا حبيبي اكتبلي عن الأحلام

والحبر من عطر الورد والياسمين...

وإلك وحدك ضحكاتي

وحياتي كتاب عنوانه حنين

ونغمات حنين...

وانت كل الجمال ونغمة أمان ...

وهيك... وأكتر من هيك بحبّك.

#كتاب