Search
  • Jamil Doaihi

مريم رعيدي الدويهي: محطّة زمان


سرقت باقه من الوقت

وهربت عالسكّيت

تاري الوقت ما إلو عبير...

رحت صوب المحطّه

تا إتلاقى بالعمر اللي راح...

تمنّيت يكون بعدو بيذكرني

وبس إقشعو يركض ويغمرني

ونرجع أنا وهوّي لمطرح ما ابتدينا

حاجه بقا يركض المشوار...

تأخّرت عالمحطّه

وشفت ناس ورا الشبابيك

وقف الوقت دقيقه

وكلّ واحد مشي بطريق

وما حدا انتبه لي

ورمي عليّي السلام...

كان التعب متل غبرا

فوق العيون...

ما استرجيت إسأل ولا سؤال

ويمكن ما حدا بيعرف عن الماضي خبر

ومش رح لاقي

من الوقت اللي باقي

غير أحزاني

وما عدت اتذكّر وين عنواني

ولا وين ضيّعني زماني.

#كتاب