Search
  • Jamil Doaihi

كلود ناصيف حرب: زعلي منك حلو


قبل ما يسرقو العشاق كل الورود

جمعتلك باقه حلوه

كل وردة بلون

تا قلك:

هيك بحبك واكتر...

عروس الكلمه

رح بتزين حالها بفستان ابيض حلو

متل قلبك

تا تكسر حيطان الصمت

وتخلي من جديد الفرح يغني

عا شباك القلب

ويرجع عصفور الربيع يقلك:

صار الورد بستان

والصبيه زينت شعرها بالياسمين

اللي عطرو فاح عا كل الدني...

لا تخلي العتم يغطي عيونها

اللي فرحو بعيونك الغاليين

وهيي رح تشتري الك

دزينة حروف من دهب

من بياع الحب

عا قد شهور السنه...

تا تضل تتذكر

كم مره غنت إلك

انت ونايم

لأنك الحياة بقلبها

تا تفنى الدني

ويعتم الليل

وتخلص حكايات الأحلام.

هلق طلع الضو عندي بس طليت عليي...

من هلق لمية سنه

رح ضل اقطفلك ورد

وخبيهم لقمر الليل

تا ضل شوف وجك الحلو

قنديل بعيوني

ويهمس عا طول العمر:

انت حبيبي.

قريبه منك وفرحي قريب...

بعيده عنك قلبي غريب.

من هيك سميتك اغلى حبيب.

هالزعل بعيوني

من يوم ما كنت قاسي معي

بس زعلي منك حلو..

وبيذكرني باسمك.

ورا كل ابتسامه

الف قصه وقصه...

وعنوان كل القصص "حبببي انت".

اانا وانت وحدنا...

وتعتم الدني...

وتنطفي الكهربا

تا حط ايدي بايدك...

تا قلك: بحبك.

وعيدها وعيدها بصوتي اللي بتحبو

ويكون شاهد عا كلامي حنينك

وضحكه حلوه من عيونك.

وهيك بحبك.

بقطفلك باقة ورد

ورده من قلبي

ورده من عيوني

ورده من روحي

ورده من دفتر اشعار

ورده من بلورتي

اللي بتحب عطرها...

بكرا بيصيرو جنينه

تا يفرحو عيونك

يا وردة حبي اللي ما بتموت.

#كتاب

1 view