Search
  • Jamil Doaihi

الشاعر د. جميل الدويهي: معقول هيك نضلّ


الإيّام عم بتغيّر وْلاد الزغار والريح عم ترْسم صوَر داير مَدار كنّا سوا نغْرق بعطر الليلكي ونقْطف زرار... ويوقَعو كمْشة زرار وتتلبّكي... وما نْعود نفْهم بالحكي الصابيع متل الكهربا، وشفاف نار... وإيّام شو كنتي شقيّه... وتضْحكي... وإركض وراكي بالسهل طول النهار... آخر هديّة عيد نقّيتا لكي خاتم دهب مشْغول من أتقل عيار... قصّة غرام انتهيت بلحظة بِكي عمّرتْ مطرح ما انفلت شَعرِك... َمزار... ولمين بدنا نشْتكي تا نشتكي؟ صار الخريف دموع عا جْناح الكَنار... والحبر أسود متل خَيل المعركه... ما فهمتْ شو مكتوب عا وْراق الغْبار الورده اللي فوق القنطَره عُودا تِكي ما عاد نسمة ليل تمْرق عالقمار... تحيّر زماني، وكيف بعْرف شو بكي؟ ومَعقول هيك نضلّ شي مِيّة سنه إنتي وأنا مراية حَنين... وانتظار... ___________________ مشروع الأديب د. جميل الدويهي "أفكار اغترابيّة" - سيدني 2019

#كتاب