Search
  • Jamil Doaihi

مريم رعيدي الدويهي: عصفورة الغياب


يا أميرة زغيره واقفه عالغصن

بتتباهى بالتوب المخملي

شو جابك بعد هالغيبه

تا تنقلي أخبار عن جنينتنا

أو تا تسرقي شي حبّة تين

تركها الزمن لعيونك الحلوين؟

ليش طال الهجر

تا تشلّعت مرجوحة الأطيار

والنحل رايح وجايي

نسي حلا الأزهار

تا يسأل عليكي:

كنتي وين

غايبه من شهرين؟

اشتاق نسيم الصبح لرقّة النغمه

ما بريد بعد اليوم يغيب هالفجر الحلو

مطرحك عنّا

بسقف هالخيمه

وإذا فكّرتي بعد إنّك ترحلي

طيري بهالمدى

عالهدا

واشلحي صوبي نظره حنوني

تا يفرحو عيوني

وتكبر الألام فينا

ويبقى الفرح زهرة أمانينا

والحبّ لون ولون يعطينا.

#كتاب

4 views