Search
  • Jamil Doaihi

كلود ناصيف حرب: حدّي وإنت بعيد


بعرف إنك حدّي وإنت بعيد

رغم التعب والإيام الصعبه

قنديل نور عا دربي

خدني بإيدي حبيبي

عا جنينة ورد وعبير...

خدني فوق البحر الكبير...

خدني عا نجمه مضويه...

واحكيلي حكايه ما بتخلص

عن أمير وأميره حبو بعضهن هني وزغار

وكبرو... وصارو غنيّه

أول كلمه فيها: "بحبك"...

والموسيقى ضحكه من عينيّي...

وهيك بحبك.

بيمرق الشتي

وبيمرق الصيف...

وإنت إنت...

صوتك الغنيه

وحنينك ورده ما بيجرحها السيف...

قمر البحيره عا طول بيقلي

إنك اشتقتلي...

وإنك إسوارة من دهب غالي اشتريتلّي

وقصيدة حبّ عنوانها "إنتي إنتي"

بعطر الياسمين كتبتلّي.

صباح رموشك

المتل ريشتين من حبر...

وعطر

وعندي كل رمش اغلى من قصر

بحب عيوني يجرحوك

بحب ابتسامتي تكون عذابك...

وبحب تشتقلي...

وانا بشتقلك

وما بتروح من بالي

يا بعيد وقريب

ومتل ما البحيرة بتغمر القمر

هيك بغمرك باحلامي...

وبقلك: انت وحدك وحدك

اغلى حبيب.

يسلملي عطر الورد

من تياب حبيبي.

قمر البحيره بيضوي طول الليل

عا شعري الأسود

عا سيف عيوني...

وبيحكيلي وأنا بسمع

هالحلو الغالي

هالقنديل العالي

قمري أنا

وما بيروح من بالي...

وهيك بحبو ...

هيك بحبو.

#كتاب

0 views