Search
  • Jamil Doaihi

مريم رعيدي الدويهي: الشمس بتغار


هالشمس شو بتغار

من القمر يللي سرق منها كمشة جواهر

وصار بالليل يتغندر

لابس دهب أصفر

وشاف حالو عا صفحة النهر

وبشوارع المدينه صار يمشي

ويخبّر قدّيش هوي غني

وأملاكو بتسوى الدني...

وحَبّو القمر ناس كتار

وشو بيكذب هالقمر

وبيألف أخبار!...

وقالو عنّو:

حلو كتير هالأمير

وبيحبّ عِنّا السهر

وبيترك عا سطيحتنا شال الحرير.

والشمس غارت من الحرامي

وقالت: شو هالقمر الغدار

عطيتو من خزنتي قنطار...

وأحلى منّي عا غفله صار...

ومن كتر ما انقهرت الشمس

شلحت حالا بالبحر

بآخر النهار.

#كتاب

3 views