Search
  • Jamil Doaihi

مريم رعيدي الدويهي: الخيمه


هالخيمه اللي كانت

فوق سطح البيت

شو صار فيها

بعد غيبة عمر؟

معقول ناطره تا نرجع

وبتتذكّر ليالينا؟

يمكن هوا تشرين خلّعها

ومحي أسامينا...

وصارو عواميدها خيالات

هربانه بالحفافي...

ونشّف القنديل

وما بقي نقطة زيت

تا تخبّر عن سهراتنا

العريشه اللي كانو عناقيدها

تريّات مضويّه

ختيرت وصارت حطب للموقده...

وشو صار بالمرجوحه

اللي كانت بفيّه الصفصافه

وكانو يتقاتلو عليها الولاد؟

نسّلت خيطانها الريح

واللي بقي منها كمشة غبار

وهجرت الضحكه باب الدار...

وكل اللي كان

صار ورا النسيان...

الإيام عم تركض ورا الإيام

والوقت مشتاق لبكرا

ما بقي لنا من هاك السنين

إلاّ قصّة حنين

وكمشة ذكرى.

#كتاب

0 views