Search
  • Jamil Doaihi

الشاعر د. جميل الدويهي: لوين راحو الناس؟


جميل الدويهي: لوين راحو الناس؟ (المدوّر العامّي)

من مجموعة "هيك القمر غنّى لعيونك" - تصدر قريباً

كرمال ضحكه من عيونِك كنت أكتب شعر أحلى كتير. ما يمْرق صبح إلاّ أنا وإنتي وخيالي يكسر الشبّاك. لكنْ بعد مدّه انسرقت مرايه... انمحى من عمرنا شويّة حبر. وتجرّحو قناني العطر. فجأه صرت متل الغريب، وصرت إسأل: كيف أهل الحيّ تركو هالبيوت مقفّله؟ كيف الربيع اصفر بالوادي؟ وأنا ما عاد بدّي فلفش وراق الحقيقه... وافتح كتابي تا شوف اللون كيف تغيّر وما عدت حالي... كان في حرّاس فوق الجسر قالو: مين إنتْ؟ وكيف هيك لبست عشب الأرض؟... يمكن من قبل ما أعرفِك كان العشْب عم يطْلع من تيابنا. وكان العتَب ساعي البريد... اللي ترك وردة خريف... منتّفه عا بابنا.

كلّ الكلام حروف. عبّينا الدفاتر والمدى... قمح السهل مش قدّ ما قلنا. حنين كتير لولا بفْرشو عالأرض بيكون الصَّلا عا شْفاف رعيان الجبال... بيصير غابات وصَدى... بيصير متل الغيم يللي بخاف منّو. هالشتي أعمى، كأنّو ما إلو عنوان... لكنْ بعدني عم إنطرك تا ترجعي من المدرَسه، وشمسيّتي بتصير خيمه، وتضْحكي وإضحك أنا. تاري الشتي والصيف كرّو متل خيْط. وبعدني عم لبّق عليكي الضباب. وعم ألحقك ما بين سطر وسطر. خلف الحبر... بركي بتعرفي كيف اخترعنا كلمة النسيان حتّى تكون عنوان الكتاب؟

قولك بعد رح نلتقي؟ طالع عا بالي خبّرك قديش في عندي دهب من خزنة الماضي، وتا إشرح كيف صار الليل قوضه مسكّره. وانتي وانا ما في حدا بيشوفنا. حتى القمر فوق العريشه قال بدّو يزور غير بلاد. يمكن عارف الاسرار كلا... وقال: خلي العاشقين بهالعتم يتخيّلو. ولوين بدهن يوصَلو تا يوصَلو؟ يا هالقمر لا تْروح... خلقو العاشقين من الزعل... تا كلّ ما فرحو دقيقه يزعلو.

الحيطان كبْرو او عيوني من السهر عم يكبرو؟ ولوين راحو الناس؟ ما بعرف اذا تركو المدينه وما بقا رح يرْجعو. بصرخ لهن تا يسمعو الغابات، لكنْ صرختي ما بيسمعو... وما ضل عندي غير كمشة ذكريات... وكم صوره... بخاف لولا قلت إني اشتقت ليكي... يُوقَعو من رموش عينيّي عا غفلِه... ومن حياتي يُوقَعو.

_______

جميل الدويهي : مشروع "أفكار اغترابية" للأدب الراقي - سيدني 2019.

#كتاب

0 views