Search
  • Jamil Doaihi

كلود ناصيف حرب: سكوتك غابات أسرار


قبل ما يطلع الصباح

وتشرق الشمس...

بتشرق ضحكتك من أحلامي

ورساله من قلبك بتوصل لعندي

عا جناح اليمامه

ولعيونك يا امير

يا حلو كتير...

ببعت معها ألف سلامي.

همسك احلى من الاغاني

واعلى من قصر مسحور...

وسكوتك غابات اسرار

سكوت هوي حنين الموج

والبعد جرح...

وزقزقة عصفور موجوع.

انا وانت والسهر والليالي

انت تغني وانا علّق نغمات صوتك

ع تيابي

وإسهر مع شموع عينيك

وتدفي قلبي البردان

من عتم الليالي...

اسهر ع ترانيم أنفاسك الحلوه

وتضل كل الليالي

توششني وتقلي:

هلقد بحبك وزيادة

إسهر ع نبضات قلبك الهادي

واسمع دقاتو الحلوه

ونغمة قوافي...

إسهر ع صوت همسك

واشلح كمشة حنين ع عطر حروفك

وتلبس النجمات الوان الحب

وعصافير الصباح ترجع تغرد ع بابي وبابك...

وانتطر نظراتك...

يا حياتي شو بحبها

مع بسمة حلوه متلك...

كل نظرة قصة وحكاية...

وانت حدّي

وعطرك ع تيابي...

يا كل حياتي...

برغم كل البعد

انت كل نغماتي...

وهيك بحبك.

#كتاب

3 views