Search
  • Jamil Doaihi

كلود ناصيف حرب: ما خلّيك تهرب من العمر


الشمس بتشرق من ضحكه...

وكلما زعلنا بتنمَحي الشمس

وما بيبقى من الحكايه

غير كمشة حكي...

وشوية ذكريات عا جسر البكي.

إن كنت معي أو مش معي

بعيد والا قريب...

غريب عني أو ساكن بأفكاري

بعدك على بالي...

وما بتروح من خيالي

يا فرح سنيني

ودهب حضورك ما بينمحى

عن مراية حنيني.

وهيك بحبك.

عا شط عيونك مسافره متل بحّار

والضحكه اللي مفصّله

عا قياس النهار

حديقة سحر وانوار...

وهاللمسه عا إيدي صحو الغابات

وينهزّ الكون

ويلبس الخريف ألف لون ولون...

ما بشوف إلا إنت...

ويا ريت الوقت بيرجع فينا

عا دراج الطفوله

تا إعمل من الياسمين إسواره...

وإحبسك من وقتا...

وما خليك تهرب من العمر...

وكل ما إغفى

تترك عا رمشي

من بوساتك غمر.

#كتاب

0 views