Search
  • Jamil Doaihi

مريم رعيدي الدويهي: ابتسامتك قهوه مرّه


من مجموعة "عالجسر العتيق ما لقينا مطارحنا"

تصدر قريباً من مشروع أفكار اغترابية - سيدني

***

أنا وإنت

عالجسر العتيق

ونظرة حنين من عيونك

هيّي ربيع الشجر

والعطر اللي بيغفى عا كتف الوادي...

هون انزرعنا بالريح

هون الحَكي رفّ يمام

هون عْطيتني إيدك

والنهر عالي

أعلى من الخيّاله...

وما خفت إغرق

لأنّك معي صَلاتي

وترتيلة عمر

وسكوتك إنت وعم تتطلّع لبعيد

من هون للطفوله

أجمل غنيّه سمعتها...

لحن رحباني رقيق

بالصبح الغميق

وابتسامتك قهوة مرّه

متل الإيّام اللي مرقو

والإيّام اللي رح يمرقو...

وأنا بشرب هالابتسامه

منشان ما تهرب من قدّامي

متل ما بيهرب من إيدينا الزمان

وبيضيعو منّا الأسامي.

#كتاب

3 views