Search
  • Jamil Doaihi

الشاعر د. جميل الدويهي: من سنه ما لقيت حالي


عليّي مْسلّطه عْيون الكَحِيله

ويا ريت المحكَمه بتخْلي سَبيلي

كلام الحُبّ مش عـا وْراق، لكنْ

حِبْر عا شْفاف… ريتِك تسلَميلي

صَــدى همْساتنا بْكلّ الأماكِن

متل همْس البلابل عالخَميله

يا ريت بحيّكن ضلّيت ساكن

تا بُوسك كل ما مرقتي عا بابي

وبِرمْشي إجرَح الرقبه الطويله…

____

حَرام تْقصّري الفستان مِيلِه

وإحكي لجارتي إنّك بخيله

وإنّك متل ليلى العامْريّه

الْما فيها خالفتْ شرْع القبيله

ورَقم ما كنتْ مرّه، ولا ضَحيّه

بْروايات الغَرام المُستحيله

وما برْضى بالعلاقه العاطفيّه

الكانتْ بين شمشون ودليلِه.

____

تا إشْبَه ناس غيري عْملتْ حِيلِه

تاري الناس عا خْيول الأصِيله

وأنا لا خَيل عندي... وْلا جَواري

خلقتْ ختيار عا هَودَج رَحيلي...

اعْشقيني لابِس التوب العْياري

وغضب إيّام ما كانت قليله

اعشقيني هيك ضايع بالبَراري

ولأنّي من سنِه ما لقيت حالي

إذا بْحالي التَقيْتي… تلفْنيلي.

____

جميل الدويهي: مشروع أفكار اغترابية للأدب المهجريّ الراقي - سيدني 2019

#كتاب