Search
  • Jamil Doaihi

مريم رعيدي الدويهي: حكايه قديمه


كان في حكايه قديمه

ضاعت من أصحابها...

ما لقيناها بالشتي النازل عالحور

ولا بالطرقات البعيده

اللي بتروح صوب الذكريات...

سألنا الصبيان

ضحكو وفاتو بضباب السهل...

سألنا الغابات

تاري ما تعلّمو الحكي

ولا فاتو عالمدرسه...

يمكن مرا ختياره سرقت الحكايه

وأخدت منها تياب من حرير

وزرار دهب

وشلحتها بالبير...

ما في حدا بيعرف وين الحكايه

إلا هالقنديل

اللي بيضْوي من قبل ما نخلق

ويمكن يضْوي

بعد ما تنتهي الإيام...

سألنا القنديل...

هرِب منّا

وزاح عن الحيط

فكّرنا إنو البيت غيّر مطرحو...

تاري الحكايه اللي منحبّها

ما لها مطرح

والناس اللي فيها ورق أصفر

وعنوانها واحد ما بينمحى...

هوّي النسيان.

#كتاب

7 views