Search
  • Jamil Doaihi

مريم رعيدي الدويهي: رفيق سهري


كتير بعرف إنّو رْفيق سهري

بيرافقني بس كُون

عم إدرزعبايه للشتي...

بيقعد حدّ الموقده

وبيقطّب معي أسرار الليل...

بيعرف قصّة حياتي

وبيسألني عن إشيا

ما بعرفها عن حالي...

سألتْ عنّو حرّاس المدينه:

شفتو حَدا مرق من هون

معو قصّه مخبّايه

ودهب الزمان؟

والحرّاس مشغولين

عم يفتّشو عن حدا هربان...

عن حرامي فات عالبيوت

وسرق النوم

من عيون الصبايا...

سألت الفلاّحين

لقيتهن مشغولين

عم بيكنّسو البيادر...

وسألت مرا ختياره

عنوانها النسيان...

قالتلي:

تا تعرفي وين بيكون

تطلّعي بحالك...

وروحي عا شغل بالك...

ومن وقتها رجعت عالبيت

وتطلّعت بالمرايه

وشفت رفيق سهري...

وعرفت إنّو هوّي أنا

وأنا هوّي...

ولولا تركني

ما بيبقى لا حبر

ولا وراق

تا إرسم الحكايه.

#كتاب

3 views