Search
  • Jamil Doaihi

كلادس القزي: صدى الوادي


عربشت عا شجره ياسمينه

تا شوفك من بعيد

ما لقيت الا صدى الوادي

واصل لعندي هربان

سالتو : من مين فزعان ؟

قلي:

من حبيبك اللي داوخني

قلتلو: شو القصه ؟

جاوبني !

ما بيتركني نام

لا ليل ولا نهار

ولا بيغمض إلي جفن

من كتر الحزن اللي بعيونو

بيضل يغني أغاني حزينه

هوى وواقف عا طرقات المدينه...

بترجاكي تحكيه

يا بنت الأمير

يمكن يسمع منك

مش إنتي حبيبتو

ومغرومه بقلبو ؟

قولي إلو :

بيكفينا حزن وهم

وآمال ساكنه فوق الأطلال...

يا الله

شو ها القصه ؟

بهرب عا الوادي تا ارتاح

بنطر نسمه هوا

تدغدغ قلبي العطشان

ما بسمع الا حبيبك المجنون

عم بيغني بصوت عالي

طيب اذا هوى عشقان

أنا شو ذنبي

إتحمل سهر الليالي

وما إحلم بحبيبتي

اللي ناطرتني بالقصر العالي

وتلاقيني ببوسه زغيره

ما بتخطر عا بالي ؟

#كتاب

10 views