Search
  • Jamil Doaihi

كلادس القزي: يا هالجبل


يا ها الجبل

قديش إنت كبير

وما بتحكي

صرلي مده بصرخ تا تسمع

والصدى بيرجع إلي...

إتركني بترجاك

وما توقف بدربي

تركني إبقى سجينه الأحزان

تركني عصفوره محبوسه بقفص

وتا إتلاقى بأميري ما كان فيي...

إنت عالي كتير

بدي ميه سنه

تا إوصل لعندك

ولاقي هاك النسر اللي بيغني للشمس

اللي ساكن فوق الغيم

اللي صوتو مليان حنين...

سهرانه أنا والليل

عد نجمات السما

والدمعه عا خدي متل الجمر

وينو حبيبي؟

زعلانه عا فراقو

ولو رجع بتفرح الدني

وبيصير عندي مهرجان كبير

لأنو أميري رجع من حدود النسيان ...

يا ها الجبل

هلقد طريقك صعبه

وإنت قاسي؟

يمكن إغرق بالوادي

ويمكن ضيع بالغابه

ويسرقني الحرامي

أو يأكلني الواوي

وما عود إتلاقى بأميري ...

يا ها الجبل

لو بتزيح

لو بتهدا الريح...

تا إتلاقى بحبيبي

بالغابه العتيقه

وأنا وهوي نتخبا منيح

والغابه تصير حريقه.

#كتاب

5 views