Search
  • Jamil Doaihi

كلادس القزي: عم خيّط رموشي


عم خيّط رموشي

تا إبقى نام

وعم بفكر باللي عذبني

ضاع مني الحنين

وغاب عا اعلى جبال...

وهونيك كل سنيني تحيرو

وضليت إبرم مع خيالي

ومشغوله البال...

من بعد ما تركني حبيبي

صفيت بلا روح

عم حاكي الضباب

وطيور الغاب.

صرت إبكي عا حالي

مده من الزمن ...

والقمر هاجر عا أبعد مدى

والقلب مليان جروح عا الحبيب

وقال: ما بدو يتركني ولا دقيقه

إلا ما يعرف وينو حبيبي

وكيف صار هيك؟

وليش حبيبي تركني ؟

وعا الطريق تحير

وسأل حالو:

معقول الأمير ضايع وحزين؟

أو مسحور بقلعه الجنيه؟

وبْرمت بالغابه ما لقيتو

والدمع عا خدي

صارعا الطريق مزراب

وبكيت الخبريه بقلب الكتاب.

وبعد مده

كان أميري بالقصر العالي

عا مخده حرير

ومسحور بأحلامو

وفرح قلبي وغنى السنونو

وعي حبيبي حيران

وبسمه منو

رجعت روحي إلي...

وفتح الياسمين

ورح ضل بوس رمش عيونو

عا طول السنين.

#كتاب

0 views