Search
  • Jamil Doaihi

كلادس القزي: لمّا القمر عا كتفي حِني


لمّا القمر عا كتفي حني

شهقت بالبكي

وتذكرت إيام الولدني

كيف كنت أقعد أنا وإنت

تعلمني شعر

وتغنيلي غنيه حب

وعا مقعد مدرستي تتغزل فيي

وترقص الكلمات بكتاب القصيده؟

وبعد مده

برمت عليك ما لقيتك

سمعت صوتك

بأحلامي ...

ومن وقتها

هربت عا دنيا بعيده

وعا كوكب زحل

كتبت شعر

وعا مسرح الأحلام

غنيت غزل...

وقلت : يمكن في أمل

يحبني هاك الأمير

اللي بإيدو غمر من نور...

وأنا من بعيد

بقيت لولح بشال العنابي

اللي كان هديه عيدي

وكتبت "بحبك"

عا لورده

وعا كتافي مشلوح شعري االليلكي...

ندهت إلك

ما سمعتني

متل كأنك ما عرفتني

يمكن نسيت إسمي

وصرت متل الغريب تمرق بالضيعه

تحاكي حالك

تنطر قمر الليالي يخبرك عني

ونسمه هوا تحكيلك

قصتي الغريبه

وكيف قسيت الإيام عليي

عند ما تركتني حبيبي.

#كتاب

17 views