Search
  • Jamil Doaihi

كلود ناصيف حرب: حنين القلب أحلى سمفونيّه


جمال صباحك بلون وردي...

وعطر ياسمين

بيسرح بين الحروف

وقمر البحيره سهران

عا شط ّعيونك.

سهرانه

وضحكتي معك

نغمه عا قيثارة حنين.

حنين القلب

أحلى سيمفونيّه

بعزفها بسّ إسمع صوتك

وببعتها مع نسمة الوادي.

بين الهمسه والنسمه

طار شال الحرير

وبالشال كم ورده

هديّه لعيونك الحلوين...

يخليلي عيونك

من عيون مشتاقين...

وما في أحلى منّك

إنت يا نغمة حنين.

قلبك حلو...

والصوره اللي بقلبك

ما بتنمحى.

كلّ ورده

ما فيها من عطر تيابك

بتكون خربف عمر...

كلّ ليل من غير أحلامك

ليل وبرد وشتي...

اغمرني بعيونك

تا يغفو عيوني.

طير الصباح خبّرني عنّك...

قلّي إنّك غايب

ونسيت الحبايب...

ما بتبعت مكتوب

لنّو شي كلمتين...

وكيف بعرف إنت وين؟

حاكيني تا إسمع صوتك

وقلّي: أنا بحبّك...

أنا بحبِّك...

تا يفرحو العينين.

#كتاب

2 views