Search
  • Jamil Doaihi

مريم رعيدي الدويهي: قمر ضايع


هالسرّ الكبير

بيتخبّا علينا ورا الإيّام

وشاغل بالنا صرلو زمان

تعب السؤال

وغير السكت ما لقينا...

بيغيب مدّه لأبعد مكان

ما بيترك خبر عنّو

ولا عنوان...

بخاف يضيع منّي

وإغرق بعتمة النسيان

ويهجرني الأمان...

بخيطان حرير بيلفّ حالو

وبيرحل مع وجّ الصبح

ما حدا بيعرف مطرحو

إلاّ قناديل السما

وشهقة الصدفِه...

لاكن وين ما بيروح

عا مراية ذكرياتي بلمحو

عم يبعت لعيوني

رسايل حنين

بركي بنامو فرحانين

عيوني الحلوين...

بيسألو عنّو ناس كتار

وهوّي عم يركض مع النجمات

يمكن هربان من شبّاك الوقت

وعا غفله وقع بالبير...

كيف ضاع منّا

ومعو أسرار إيّامنا

وحكايات من أحلامنا؟

هوّي اللي كان دهب العيد

سراج معلّق بسمانا

وفرح المواعيد.

#كتاب

5 views