Search
  • Jamil Doaihi

مريم رعيدي الدويهي: حكاية العمر


سوا كنّا من أوّل المشوار

مرافقني من زمان الطفوله

بغْفا وإنت سهران

بكْبر وبتكبر معي...

يمكن مشغول

عم بتعدّ إيّامي...

بتفرح إذا بفرح أنا

وإذا ببكي

متل طفل زغير

بتمسح دمعتي

بمنديلك الحرير...

ومهما تركض خيل السنين

بين مبارح وبكرا

وتتجرّح الفكره...

بتسهر معي بعيد ميلادي...

لاكن شو بخاف

إنّو تضيع قصّتنا

وتتشلّع وراق الكتاب

وورقه ورا ورقه

ويوقعو متل ورق الخريف

تحت شمس الغياب...

والريح المجنونه

عا شطّ بعيد ترمينا

وما نعود نلاقي أسامينا...

بهاك الوقت منصير نحنا الماضي

وعم مرايتك صورتي أنا

يا عمري

يا حامل الأسرار

يمكن شي يوم

تطلع من حياتي

وتصير عني بعيد

ويصيرو المواعيد

سطور مجروحين

عا صفحة ذكرياتي...

#كتاب

4 views