Search
  • Jamil Doaihi

مريم رعيدي الدويهي: كنت زغيره


كنت زغيره

وإغفا بحضن المرجوحه

وتفيّقني إبتسامه صبحيّه

مرسومه عا وجوه ناس

هنّي فرحي ومرايتي...

وكانت حدودي الغنّيّه

ورفيقتي الورده المخمليّه...

وكنت بزوايا غرفتي

خبّي أسرار كتار

وألعابي كانوا رفقاتي

وأحلى ما عندي...

ما رحت مرّه لبعيد

ولا تركت ضوّ القمر

إلاّ وحدا يمسك بإيدي...

ولمّا الخريف يبّس وراق الشجر

أخدوني من نومي الغجر

وصرت ببلاد جديده

فيها محطّه

وناس رايحين

ما عندن أسامي

إلاّ وجع السنين...

شفت شوارع غريبه...

وأسوار

وهيك صرت إكبر وإكبر

بقلب الحكايه

وبقصر عالي

لقيت حالي

مملكتي صارت جمال الصُّدفه

وهونيك لبّسني القدر

دهب غالي

وتوب الحرير

وما عاد فيّي إرجع

للبيت الزغير...

ما بين عمر وعمر تاني

صرت إمشي أنا وأحزاني

وتعبو منّي المشاوير

وما عاد فيّي طال الشمس

من ورا قضبان السرير.

#كتاب

2 views