Search
  • Jamil Doaihi

أوجيني عبود حايك: الكون رسمه


الله رسم هالكون بريشتو السحريّه

ولوّنو بألوانو الألوهيّه

تأنّى تا صارت اللوحه أثيريّه

انغرّت الشمس بروعتها

تحرقص القمر بطلّتها

وتسرق قلبو بغيبتها

خلق الربيع

وانكسر القالب...

طيور تغنّيلو

ونحلات تكاغيلو

كبر وصار شبّ حلو

الزهور لبْستلو فساتينها الملوّنه

الياسمين الأبيض طرحة عروس

والضباب خيول بيضا ومعازيم...

اللوز زهّر

والورد الأحمر عالحيطان عربش...

زينه ولا أروع!

فراشات ترفرف بحقول عا وسع المدى

عيون غرقانه ببحر الصلا

والوادي سكران بالصدى

وفصول ورا الباب ناطره دورها عالسكّيت...

شطوط عم تلمع متل الدهب

ولاد راكضه

وقلوب مليانه حب وفرح

وعرايش ملوّحه...

قيلولة بعد الغدا

والدفا عفا...

قنديل الصيف انطفا

لمّا نسّم أيلول

وهرّت وراق الشجر...

تعرّت الأغصان

وصارت تتطلّع بحالها خجلانه

سمعها الشتي...

بعتلها التلج غطّاها بنفنافو

وقلّها: ما تخافي...

دمّعت وقالت:

إذا مش هلّق بكرا

أو بعد سنه أو أكتر

بصير حطبة بكانونك

بيتدّفو عليها تا إنطفي

وبصير حكايه غافيه

عا سطور الورق

متل كلّ حكايات هالدني.

#كتاب

4 views0 comments