Search
  • Jamil Doaihi

كلادس القزي: الضحكه الغريبه


هالضحكِه الغريبه

جنّنتْ أهل المملكه والمدينه...

مرّه بيتكون عاصفه قويه

ومرّه زنبقه هاديه...

شو السرّ اللي فيها؟

أنا بعرف ليش؟

لأنو حبيبي بيضحك لكل الناس

بس بالأساس

أنا عندي إحساس

إنو ما بيضحك من قلبو إلا إلي

لمّا بيشوف عيوني العسليه...

بيضل ناطر عا الشباك

صبح ومن عشيه

ومدوّخ شاويش الساحات

عا قد ما بيغني ليالي وآهات...

حامل بإيدو صورتي

والذكريات

وإيامنا الحلوه

والسهر والحكايات...

ومرّه لمّا طليت

صرّخ بالعالي

ونقّز قمر الليالي...

ضحكنا سوا...

والضحكه ركضت بالغابه

متل نسمة هوا...

وطيور السما

وقفو عا الشجر يتفرجو

كيف عم نمشي بين الزنبق والمنتور

وتتخبّى تحت السنديان

وما حدا يعرف سرّنا

إلاّ القمر الجهلان.

حبيتها كتير

هالضحكه الحلوه

يا حبيبي إنت

يا أطيب قلب...

يا مخبّا ها الضحكه بعلبه

وأنا حراميّه

ومعي شهاده من قاضي العدليه

بحبّ إسرقها

وطير فيها عا حدود الزمان.

#كتاب

6 views