الشاعر د. جميل الدويهي: مراية حَبيبي

May 27, 2018

 

مراية حبيبي اللي أنا حِبّيتها،

بخْزانتي خِبّيتها...

وما بْحبّ يلمسْها حدا

ولولا الحرامي فات عا بْيتي

وسرَق كلّ الدهَب

كلّ العلَب

ما بْريد إنّو يشوفها...

وما همّني

يسرق إذا بدّو الهدايا كلّها

تيابي الجديده

ويسرق كتاب الشِعر

والمحبره الفيها عطر

لكن ما بدّي هالمرايه تكون مع غيري حدا...

ورح ضلّ اتطلّع

تا فيها شوف أحلى عيون

بيقولوا: "حبيبي"... عالهَدا.

_________________

 

برْوازها من وَين؟

حفْر كتير غالي...

وانْشغَل سنتين

حتّى صار هيك بيلمعْ

ومنشان ما إزعل أنا وقلبي الحزين...

عالزاويه من فوق صُورة ياسمينِه

وما حَدا بيحبّ قدّي الياسمين...

ومِن تحت عصفورَه عا غصن زغِير

عم تضْحك إلي...

وشو بحبّ ضحكة هالطيور العاشقين...

عندي حَنين البحر...

يا ريت البحر بيخبّرو

قدّيش في عندي حنين.

________________

 

يا مراية اللي بحبّها

البرْواز لو مرّه انكَسر

رح ينكسر قلبي معو...

ورح يزعلو الأشعار

ويصيرو القوافي من حجَر...

قدّيش بيّاعين مرْقو

وقال بدهن يدْفعولي كتير

يمكِن فكّرو إنّي فقير

وما في معي تا إشتري من السوق

بَدلِه من حرير...

لكن ما بدّي صِير

تاجِر أو غني...

عندي حبيبي...

وهالمرايه اللي حلقتْ تا حبّها...

وما بْبِبيعها بمال الدِّني.

________________

 

وشو خصّ جيراني تا عنْها يسْألو؟

وجارَه حسودة قالت: تغيّر جميلْ

صرْلو شهْر ما قال:

"يا جارَه صباح الخير”...

يعني مش قليل...

قلتلّها: حبّيت...

لولا بخبّرك

رح تتهْميني بالْجنون...

قلبا حُلو...

وجّا حُلو...

وصوتا حنون...

وعيونها أكبر من عيونك

يا ريتِك تقبْريني...

ويقْبْروني هالعيون!

________________

 

يا مراية اللي كلّ يوم الصبْح

عم تضْحك معي...

منحْكي عن الماضي...

وعن الساعات كيف بيهرْبو

وكيف العتم بيناتنا

وصمْت الجبالْ

وكيف التقيْنا وما التقيْنا...

وكيف حبّينا

متل ما بيعْشقو مْلوك الخَيال...

وكيف البريد لعندْها بيروح

تا يوصّل لها مكتوب

أو يطْرح سؤال...

يا مراية اللي ندَرتْ ميّة ندْر حتّى لقيتْها

ما ضلّ عندي من زمان الحُبّ

ذكرى غير إنتي...

وليش إنتي بتكْرهي جنس الرجال؟

كلما أنا تطلعت فيكي

صُورتي ما بشوف

بسّ بْشوف عا قزازك مَرا حبّيتها...

ولحظه إذا بتغيب عنّي

بيحْزَنو طْيور الشجر...

وبْسكّر الشبّاك حتى ضلّ وحدي

ما معي غير الضجرْ...

لا الشمس فيها تزورني

ولا بيمْرق لعنْدي قمَر.

 

 

 

 

 

Please reload

أخبار الجالية

كلود ناصيف حرب عن "نغمات على قيثارة الحنين"

December 9, 2019

1/10
Please reload

كُتّاب و شُعراء 
Please reload