كلود ناصيف حرب: نقوش في غابة الحنين

October 22, 2018

 

يا ضحكة النهر والموال

 يا نطره ابعد من الفكره

 يا دمعه وابتسامة

يا قمر بينزل من السما

تا يمشي قدامي

ويكرج عا قلامي.

 

وحياة هالورده المخمليه

وهالنجمه الصبية...

انا اللي خبيتك بكتابي...

وغنيت لعيونك يا امير الليل

وبتسألني كيف بحبك؟

متل السحر...

متل شي رحله عا أرض مجهوله....

متل العوده للطفوله

والحب مش نظره

 ولا كلمه بيمحيها الزمان

 الحب مكتوب بحبر النطرi

و متل الشجره

اللي واقفه بالربح

 ما بتزيح

ولا بتغلبها الاحزان.

 

وبتضلك شمعة أحلامي

وآمالي والأغاني

ورح ضل ازرع

ورد بهاك الغابه 

مطرح ما صارت المطارح

تعزف عا غيتار حروفك

وتغرد الطيور أسرارك

وردة الصبح قلت عني

وانت عطر الغابه 

نجمة أحلامك خبرت الليل عني

وأنت قمر النجمات

تا يضلو يضحكو عيوني

عطيتني كمشة أشعار

وغاية الجمال كانت بهاك الغابه

لا تروح يا ضحكتي الغاليه

انت البسمة ع شفافي الحلوه

 اذا شي لحظة تأخرت تا سلم عليك

لازم تعرف اني عم أسمع دقات قلبك بقلبي.

 

من وحي عينيك وزمن الهوى

 كتبتلك بالريشة

وقلت: يا حبيبي

 غالي انت غالي

 وما بنام الليالي

 يمكن شي مره أقسى

يمكن شي مره انسى

وكيف بقدر امحي ورده انزرعت ببالي

غالي انت غالي... 

وحياتك وما عرفتك من حالي

وهيك بحبك.

 

بتطلع بعيونك تا لاقي حالي

واللي ضيعوني وعالمينا نسيوني

عرفو اني بقلبك

 وما بدي يشوفوني...

عيونك شو بيقولو خبريات كتار

رموشك هني خيمه

وبخاف من الغيمه

بدي ابقى جوا...

جوا قلبك جوا...

وقلبك هوي الكون.

واهلي لو قالولي تا ارجع عالبيت،

بقلن بيتي هون.

 

مين اللي تركني وحدي بالغياب؟

 تاري الشتي القاسي فرق الأحباب

عالموعد نطرتك...

تأخرت ونطرتك

يا حبي اللي جايي تا تمحي العذاب.

 

عا دفتر حنين عم اكتب لمين؟

عم اكتب حبيبي...

لعيونك الحلوين.

تعرف ليش الورد اغلى من الدهب؟

لانو بالعطر بكتب اسمك

وكلما بمرق حد الورده بتعطيني مكتوب

بالاشواق مكتوب

أول كلمه بحبك آخر كلمه بحبك

وهيك انا بحبك.

 

بغضب لما بتبعد عني

 ويفرح لما يتقرب مني...

 انا طفله زغيره كبرت عا ايديك

وسكنت تحت رموش عينيك...

بغار عليك وبخاف عليك..

وهيك انا بحبك هيك. 

 

القمر ما بينوصف

 بيسكت الكلام

 بيوقف القلب

يا قمر فوق البيت

 انت شمعه وفي مرة انطفيت

وحبيبي الغالي سافر من قبالي.

لا تتخبا ورا ا الغيم...

عربش عالشجره وطل عا شباكي.

الصبية غافيه وباحلامها

ما حدا إلا أنت وقمر تاني

هوي متلك جبينو عالي

وبيشبه الخياله...

وغيرو ما بيحلالي.

 

شو عم بتقول هالصورة؟

 شو عم تحكي معي وساكته؟

 حروف غميقة متل البحر

كلمة حبيبي عا شفاف ارق من العطر..

وشمعه عم تضوي شمعه..

وحدي بتدوب دمعه ورا دمعه

ووحدي بتبقى من هلق لآخر الدهر...

 

كيف بدي ازعل منك

واحرمك من الضحكه؟

وشوف قديش بحكي...

ولو ما انت غالي ما كنت حروف من دهب لعيونك بحكي... 

وتسلم هالضحكه.

 

رسايلنا الحلوين

فيهن ذكريات من عمر حلو.

يبا ريت بيبقى الحلا.

يا ريت العمر بيوقف

تا ما تخلص اللحظات ...

يا ريت.

 

انت الصوت والنغمة والبسمه...

وغيرَك لا صوت ولا صدى..

 

تحت الشمسية أمان

 لا تخاف يا قمر الزمان.

 

 

Please reload

أخبار الجالية

كلود ناصيف حرب عن "نغمات على قيثارة الحنين"

December 9, 2019

1/10
Please reload

كُتّاب و شُعراء 
Please reload