كلود ناصيف حرب: يا عيونك الحلوين

January 23, 2019

 

وين هالغيبة؟

اذا كنت مشغول ما بتحاكينا...

واذا كان عندك وقت بتنسى أسامينا.

يا عيونك الحلوين هني قصيدتين حب...

هني شطوط من حبر اسود ما لهن مينا...

ونحنا اذا غرقنا...

مين يا حلو غير اللي غرقنا... بينجينا؟

 

هالعصفور الحلو متلك يا حلو

علمتو يغني

ويغرد ع شباكي..

وتفيق اميرة حلوة من نومها بكير ...

ويقلها: طلع الضو

وحامل سلام من اميرك

اللي ناطر عا نار 

وعرفت الصبية الحلوة اشواق حبيبها

وقالت بعيونها وقلبها ورقة صوتها:

هلقد بحبو انا

هلقد بحبو...

 

حد شباكك هالعصفور الملون

تا يحكيلك عني...

انا اللي علمتو يغني

وعلمتو كيف يحب.

وهلق الغابه مليانه عشاق واغاني

وكل غنيه بتخبر عني وعنك اسرار

نحنا اللي قصتنا اغمق من البحر

وارق من الاشعار

وهيك بحبك واكتر ...

وحبي الك دهب غالي لا بيعتق

ولا بيتغير.

ايه... هيك بحبك .

Please reload

أخبار الجالية

كلود ناصيف حرب في لقاء صحفيّ مع د. جميل الدويهي

December 23, 2018

1/10
Please reload

كُتّاب و شُعراء 
Please reload