أوجيني عبّود حايك: لحروف أبجديه

February 26, 2019

 

وعيت عا صوت الموج 
وشافت النور عا شطوطنا
فاحت منها ريحة القرنفل والياسمين والورد
سافرت عا كل العالم
حملت إسمنا وتاريخنا
منتنفّسها وين ما كنّا وبنفتخر
بس لْحروف بدها عناية
والإ بتبقى تاريخ ما إلو حاضر 
بتشبه حبّوب الزرع إذا انزرعت بين الشوك بتختنق
وإذا انزرعت بأرض صالحة وخصبة ما فيها تعصّب وتسييس
بتصير بيادر معرفة ووعي
بتصير وراق بيضا  مسطرة بالنور والفلسفة والإبداع
بتصير حرّية ودستور وقانون عادل وحوار وتعايش نضيف
بتصير جمهوريّة
رئاسة ومجلس وحكومة وشعب وحرّية تعبير 
محكمة عادلة وقاضي ضميره حيّ ومحامي جريء
بتصير جيش واحد قوي كلّو كرامة وعنفوان 
بتصير موظّف بيحترم الوقت والناس
نشيد وطني حقيقي واستقلال
إيمان وتقوى وفضيلة... أخلاق وتواضع وقِيَم
حراش خَضرا شاسعة وشلّالات متدفّقة
شطوط نضيفة وسياحة 
تبادل تجاري واستيراد وتصدير
أدمغة ما بتهاجر
فرص عمل وإزدهار... مسارح وفن راقي
وألحان ما بتموت عا مر الزمان
بتصير دوا مدّتو صالحة وإبرة مسكّنة للوجع
بتصير إنسانية ما بتهمّش المعاق
ضمان ومستشفيات وضمان شيخوخة 
عمران وإسكان... بتصير تخطيط ومنشآت
بتصير تدوير نفايات وكهربا دايمة مش موتورات
بتصير بلد متكامل بيحترم الناس والحقوق والحرّيات 
تاريخ وكتب عا رفوف الحياة  كلّن عمق ووجدان
بتشبه قدموس
بتشبه جبران وسعيد عقل 
بتشبه فخر الدين ويوسف بك كرم
شربل ورفقا
عاصي ومنصور 
زكي ناصيف وفيلمون 
وديع وصباح وفيروز
ريمون جبارة روميو لحّود
أنطوان كرباح 
فؤاد شهاب
رشيد نخله
فؤاد أفرام البستاني
بتشبه ناس كتار تركو بصمة
بتشبه أبطال استشهدوا 
وناس ضحّو وناس عّم بتضحّي 
تا يكون في وطن حقيقي
بدّوا يانا نتكاتف
نحبّو بضمير
نشتغل كرمالو بشرف
نحافظ عا تاريخو
ما نبيعو بسوق المصالح والضغاين
تا تبقى حروفو منارة
وما تصير بسّ خبرية الماضي 
ويضلّ أرزو شامخ
إسمو لبنان.

Please reload

أخبار الجالية

كلود ناصيف حرب عن "نغمات على قيثارة الحنين

December 9, 2019

1/10
Please reload

كُتّاب و شُعراء 
Please reload