جميل الدويهي: رِدّو القمر عا مطرحو

October 22, 2019

 

يا هالوطن
يا وقعتْ من قلب الكتاب
يا هربتْ منّي
وما بقا معروف وينك بالضباب...
يا هالجبين الفوق
يللي علّم حروف الكتابه للدِّني...
وكنت الغني
صفّيت أعمى
والبحر بيناتنا
وما بينْشف بميِّة سنه.

يا هالوطن زعلان منّك
قد ما عذّبتني...
وتركتني عالشطّ
عم حاكي السكوت
وقدّيشني مشتاق عا هاك البيوت
عالسنديانه...
عالنهر...
عالمصطبه الفوقا عِنب
وكْبوش توت
ما خفت مرّه من السفر
لكن بخاف من الضجر
وبخاف إنّي بعيد عن لبنان مُوت.

ردّو إلي الطفل الزغير
يللي تركتو
وبعْد غافي عالسرير...
انكسْرو اللعَب...
والريح شلحتني أنا
وضحكة عيوني
بقلب بير...
لا تسالوني: منين إنت؟ منين؟
ما عندي هويّه
غير هالجرح الكبير...
من الصبحْ عم اشحد
عا جسر المملكه
وكلّ البقي عندي
قميص مجعلكه
من بعد ما كنت الأمير.

يا هالوطن
ليش الحرامي فيك قاعد بالصوَر؟
عم يضحك وما بيستحي
قولك ضميرو من حجر؟
وبيمْدَحو شعّار
هللي بيسرقو مال اليتامى
وقال: ما عندُن خبر...
يا ناس متل العاصفه والرعد
إتتو غيّرو التاريخ...
ردّو للشجر لون الشجر
ردّو القمر عا مطرحو
بيروت أحلى كتير
مع ضوّ القمر
واللي بيقولو: الناس خدّام وعبيد
قولو لهن:
نحنا الكرامه
وثورة الشعب العنيد...
ونحنا اللي بدنا نفتح بواب الحديد
تا يرجع الإنسان يخلق من جديد.
_______
مشروع الاديب د. جميل الدويهي افكار اغترابية للادب الراقي _ سيدني ٢٠١٩

Please reload

أخبار الجالية

كلود ناصيف حرب في لقاء صحفيّ مع د. جميل الدويهي

December 23, 2018

1/10
Please reload

كُتّاب و شُعراء 
Please reload