كلود ناصيف حرب: إسمَك غير كلّ الأسامي (إلى الوطن)

November 14, 2019

 
إنت شايف البيحبّوك؟
من بعيد ندهوك؟
مسحو دموعك بالليل
عطيوك خيل القصايد
ودهب المواعيد
يا وطني البعيد
يا حكايه قديمه
من إيّام البحّاره
وملْكات لبْسو حرير
غالي كتير
وأساور أرجوان
وإسمك إنت غير كلّ الأسامي
يا وطن الإيمان
يا عالي متل الرمح
وجبينك هوّي الزمان...
والخلود إنت...
لأنّك شقفه من السما
وقعت هالأرض
ولأنّك للكرامه عنوان.


***

صرنا متل الغُربا
منمْشي تحت الشتي
وتخزّقوا الشهور...
وما ِبقي من أعمارنا
إلاّ موج البحر
ومَراكب مكسوره
وعيون عم تتطلّع بالصوره...
هونيك كان في نهر
وطاحونه عتيقه
وبتقول الأسطوره...
إنّو السفر صار حروف
والموج قصايد...
ويمكن أنا إرجع
أو ما إرجع...
يمكن تناديني السفينه
وما إسمع
كل شي يمكن يصير
لكن إنتْ يا لبنان
ما بتطْلع من قلبي
ولا أنا من قلبك بطْلَع.

 

كان في بنت حزينه

تركت بيتها

وسافرت عا مدينه

خلف المراكب والبحّاره

وضاعت لعبتها بالبحر

وضاعت الإسواره...

وهدير العاصفه

أعلى من صوت الغنّيّه...

يا ورده

عا باب البيت العتيق

لا تنسيني عالطريق

ودّيني عا سرير العطر

وعا مرجوحتي

اللي حدّ الياسمينه

وبشرشف القمر غطّيني.

Please reload

أخبار الجالية

كلود ناصيف حرب في لقاء صحفيّ مع د. جميل الدويهي

December 23, 2018

1/10
Please reload

كُتّاب و شُعراء 
Please reload