مريم رعيدي الدويهي: تعبت من السفر

November 14, 2019

 

يا وطني العالي

متل جراس العتيقه

متل ورده مرسومه

عا مراية حديقه

يا نسر جارح

بالسما الزرقا

يا غنيّة فيروز

والموسيقى الرقيقه...

خدني من إيدي

أنا تعبت من السفر...

قولك أنا كذبه كبيره

كتبتها الريح

عا حيطان الضجر؟

مشتاقه للشطوط البعيده

لغناني الحصّادين

لبيوتنا الحلوين

اللي فوق مضويّين

متل بيوت القصيده...

 

كان عندي وطن

راح مع الغجر

وما إلو عنوان

وأنا تحت الشجر

ما لقيت شال الأرجوان

ولا فتحت عيوني

عا قمر الزمان...

ضاعت الغابه

ومرجوحة عصافير

حدّ الغيم

وصرت إسأل

عن بنت زغيره

بين الدمع والنطره

كانت لابسه بلوزه حمرا

وصارت لابسه النسيان

ومشيِتْ لبعيد بعيد

عا دروب الحرمان...

 

راجعه عا ضيعتنا

تا نام نوم الهنا

أنا من دونك يا وطني

ناقصه حدا

هوّي أنا. 

Please reload

أخبار الجالية

كلود ناصيف حرب عن "نغمات على قيثارة الحنين"

December 9, 2019

1/10
Please reload

كُتّاب و شُعراء 
Please reload