كلادس القزي: مكتوب عا جبين الأمير... لبنان

November 18, 2019

 

 

القمر سهران عم يبعت خبر

لعيون حزينه

قديش في عندها قصص

فجأة 

الحرامي فات من تحت البواب

خزق  ثيابي 

وسرق أحلامي 

وصار الدمع يبكي

عا حروف أغلى من الدهب

وعا صور ضيعها الزمان 

صار البيت حزين 

والربيع حزين 

سألتو:

ليش الورد تاكي عا الرصيف 

تحت غيم الخريف...

وتحت القناطر فزعان

وكتب عا جبينو النسيان؟

نزلت دمعه عا خدو  

حرقت قلبي وقلبو

والسما بكيت لولو وأرجوان ...

 

وهونيك عا الطريق 

طفله زغيره غامره لعبتها

تصرخ لامها اللي تركتها:

وينك يا إمي؟

تركتيني  طفله مشرده ومسكينه 

عا طرقات المدينه...

والقمر قلها :

لا تبكي  يا بنتي 

إمك ملاك بالسما البعيده...

 

يا قمر 

اشتقت  لحضن إمي

فزعانه  من برد تشرين 

فزعانه ياكلني الواوي 

فزعانه عا وطني اللي فيه ربيت

فزعانه ضيع بالغابه الكبيره ... 

تخمين راحو 

وما بقى رح يرجعو؟

سافرو مع طيور السما 

مع مراكب البحاره

اللي غرقت ببحر النسيان ...

صار الليل بردان

ومين اللي بدو يحميني

من غدر الزمان؟

ومن الحرامي اللي ناطر

تا يخرب المدينه 

وينتّف زهر الياسمينه؟

 

نجمه بالسما 

ندهت  إلي:

انا هون يا بنتي 

ما تبكي يا أميره 

لأني بحبك قد الدني 

وبحميك بدموع عينيي

رح ضوي إلك شموع الحنيه

ومع كل شمعه

تذكري قلبي

اللي حبك  اكتر من روحي

وبكرا منتلاقى

مع أمير السلام 

اللي قلبو مليان حنان 

اللي مكتوب عا جبينو كلمه وحده 

هيي ... لبنان. 

ard

Please reload

أخبار الجالية

كلود ناصيف حرب عن "نغمات على قيثارة الحنين

December 9, 2019

1/10
Please reload

كُتّاب و شُعراء 
Please reload