مريم رعيدي الدويهي: عا جبين القمر

January 4, 2020

 

عا بالي بالعيد

إسهر مع النجمات

وشرّع لعطر الليل شبّاكي

وتحملني النسمه لفوق

ورا حدود الصمت تشلحني

تا كون بعيده

عن زحمة الناس

وإسرح بفضا أحلامي...

 

وحيده بدّي كون مع الحريّه

طليقه

متل الحقيقه...

هونيك النور بيتجلّى

وبيغمر وجودي بالأمان

وروحي اللي كانت ضايعه 

من زمان

ترجع لعندي

وإتصالح أنا وهيّي

وإسرق كمشة صفا وراحة بال 

من شجره خياليّه...

وبين دمعي وإبتساماتي

حيّك بدلة حرير

تا لبّس الإيّام

وإترك عا جبين القمر 

بوساتي.

Please reload

أخبار الجالية

كلود ناصيف حرب عن "نغمات على قيثارة الحنين"

December 9, 2019

1/10
Please reload

كُتّاب و شُعراء 
Please reload